Bu gün Bakı Əyləncə Mərkəzində «World Summit Award» beynəlxalq müsabiqəsinin Azərbaycan üzrə milli qaliblərin mükafatlandırma mərasimi keçirildi. Kommunikasiya Texnologiyaları Mərkəzinin direktoru Fərid Kazımov tədbiri açaraq qalibləri təbrik etdi, «World Summit Award» beynəlxalq müsabiqəsinin BMT-nin dəstəyi ilə keçirildiyini diqqətə çatdırdı. Bildirildi ki, müsabiqənin əsas məqsədi dünyada informasiya və kommunkisiya sahəsində ən qabaqcıl müxtəlif layihələri, internet saytlarını, elektron dərslikləri və digər layihələri ilə üzə çıxarmaqdır. Dünyanın 169 ölkəsini əhatə edən bu müsabiqə iki ildən bir ölkə üzrə 8 nominasiya üzrə keçirilir və qalib gələn layihələr müsabiqənin finalında iştirak edir.
     Bu il Lit.az portalının layihələrindən biri (bu layihələrə H.Cavidin Ev Muzeyinin saytı, AMEA Mərkəzi Elmi Kitabxanasının korporativ saytı, Proqres Veb yaradıcılıq və Dizayn studiyası və s. daxildir) www.csl-az.com saytı “Elektron elm” nominasiyası üzrə qalib elan olundu. Mükafatı qəbul edən Lit.az layihəsinin rəhbəri Cavid Cəfərzadə “World Summit Award-2007” müsabiqəsinin təşkilatçılarına minnətdarlığını bildirdi. “Bu mükafat yalnız bizə deyil, həm də Azərbaycan elminə verilən qiymətin təzahürüdür” deyən C.Cəfərzadə digər qalibləri də təbrik etdi. Azərbaycan üzrə digər qaliblər elektron hökumət üzrə www.taxes.gov.az saytı (Vergilər Nazirliyi), elektron tədris üzrə «Çaşıoğlu-Multimedia» şirkətinin yaratdığı interaktiv tədris proqramları, elektron mədəniyyət üzrə «Musiqi dünyası» jurnalının layihəsi, elektron biznes üzrə «Azərfon» şirkətinin «Nar Mobile və mən» xidməti, elektron əyləncə üzrə www.festival.jazz.az saytı və elektron cəlbetmə nominasiyası üzrə www.day.az xəbərlər saytıdır. 2005 –ci ildə olduğu kimi bu il də elektron səhiyyə üzrə layiqli layihə olmadığına görə mükafat verilmədi. Day.az xəbərlər saytının baş redaktoru Elnur Baimov isə çıxışında qaliblərə müsabiqənin “İtaliyada mərhələsi”ndə uğurlar arzuladı.
     Xatırladaq ki, Azərbaycan üzrə qaliblər bu il noyabr ayının 5-də İtaliyanın Venesiya şəhərində keçiriləcək «World Summit Award» beynəlxalq müsabiqəsinin finalında iştirak edəcək.

Elşən Çingiz
Lit.az

Tədbirdən fotolar