17 may Ümumdünya İnformasiya Cəmiyyəti günü Bakı Əyləncə Mərkəzində ənənəvi “Netty” Milli İnternet Mükafatının təqdimat mərasimi keçirildi. Uzun sürən səsvermə və təhlillərdən sonra (5 fevral-17 may) Lit.az portalı müsabiqənin “Mədəniyyət və incəsənət” nominasiyasında qalib gələrək birinci yerə layiq görüldü. Tədbiri giriş sözü ilə açan müsabiqənin təşkilat komitəsinin üzvü Vyaçeslav Sapunov “Netty” müsabiqəsi barədə ətraflı məlumat verdi. Bildirildi ki, bu il 4-cü dəfə təşkil olunan müsabiqədə 350 sayt namizədliyini irəli sürüb. Onlardan 11 nominasiyada 40-a yaxın sayt finala çıxıb. 11 sayt isə birincilik əldə edib. Beləliklə,
        “Dövlət saytı” nominasiyası üzrə- www.taxes.gov.az -Vergilər Nazirliyinin saytı
        “Korporativ sayt” nominasiyası üzrə - www.bankrespublika.az- “Bank Respublika”nın saytı
        “Elm, təhsil saytı” nominasiyası üzrə- www.katarakte.net- Katarakta əleyhinə mübarizə saytı
        “Mədəniyyət və incəsənət” nominasiyası üzrə - www.lit.az- Lit.az-Azərbaycanın Ədəbiyyat portalı
        “İnformasiya və xəbərlər” nominasiyası üzrə - www.novosti.az-
        “Xəbərlər-Azərbaycan” informasiya agentliyinin saytı
        “Servis sayt” nominasiyası üzrə - www.jobsearch.az- İş axtarışı portalı
        “Əyləncə saytı” nominasiyası üzrə - www.open.az- Əyləncəli musiqi saytı
        “İdman saytı ” nominasiyası üzrə - www.agf.az- Azərbaycan Gimnastika federasiyasının saytı
        “Azərbaycan” nominasiyası üzrə- www.museum.musigi-dunya.az - Üzeyir Hacıbəyovun Virtual Muzeyi
        “Şəxsi sayt” nominasiyası üzrə -www.adaletshukurov.az- Müğənni Ədalət Şükürovun saytı
        “Cəmiyyət” nominasiyası üzrə- www.4uth.az- Cənubi Qafqaz gənclərinin reproduktiv sağlamlığı saytı qalib gəldilər.

       Tədbirdə iştirak edən Lit.az ədəbiyyat portalının rəhbəri Cavid Cəfərzadə və baş redaktor Barat Talıbzadə təqdimat zamanı çıxış edərək müsabiqə barədə fikir söylədilər. “Bizim üçün çox dəyərli olan bu mükafata layiq görülərkən “Netty” müsabiqəsinin keçirildiyi ilk illəri xatırlayıram. Həmin vaxt müsabiqənin təşkilatçıları iddia edirdilər ki, müəyyən bir vaxt keçəcək və “Netty” Azərbaycanda ən ciddi və mötəbər müsabiqəyə çevriləcək. Zaman keçdi, illər ötdü və bizlər əmin olduq ki, bu iddialar əsassız deyilmiş. Bəli, bu gün birmənalı olaraq qeyd edə bilərik ki, “Netty” mükafatını təsis edənlər, qalibləri müəyyənləşdirənlər Azərbaycanda informasiya resurslarının, internet ehtiyatlarının, milli elektron kontentlərin ən obyektiv qiymətlərndirmə mexanizminə əsaslanır və öz işinin öhdəsindən layiqincə gəlir” deyə Cavid Cəfərzadə bildirdi. Öz növbəsində Barat Talıbzadə də çıxış edərək müsabiqənin təşkilatçılarına, “Netty” Akademiyasının münsiflərinə, eləcə də, Lit.az-ı finalçılar arasına çıxarmış virtual jüri üzvlərinə bütün kollektivimizin adından təşəkkür etdi. Mükafatı Lit.az-ın nümayəndələrinə təqdim edən Azərbaycan Respublikası Mədəniyyət və Turizm Nazirliyinin Analitik təhlil və proqram təminatı şöbəsinin müdiri Habil Abbasov və Azərbaycan Respublikası Gənclər və İdman nazirliyin nümayəndəsi də çıxışında qalib portal barədə xoş sözlər səsləndirdi, resursun əhəmiyyətindən danışdı.
       Tədbirdə qaliblərə “Netty”nin simvolu, diplom, eləcə də, “Gigatech” şirkətilə “Əli və Nino” kitab evinin qiymətli hədiyyələri təqdim olundu. Rəsmi təqdimat mərasimindən sonra qaliblərin şərəfində ziyafət verildi, bir sıra mədəniyyət və incəsənət nümayəndləri çıxış etdi. Xatırladaq ki, müsabiqənin yayım hüququ “Space” televiziyasına məxsusdur. Təntənəli təqdimat mərasimi bu günlərdə sözügedən kanal vasitəsilə efirə gedəcək.
        Sonda bir daha bizi finalçılar arasına çıxarmış, bəlkə də heç zaman adını bilməyəcəyimiz, üzünü görməyəcəyimiz 62 nəfər virtual jüri üzvünə-sıravi internet istifadəçilərinə öz təşəkkürümüzü bildirirk. Sizlər, onlayn səsvermə zamanı portalımıza dəstək olmasaydınız bu gün Lit.az qalib gəlməyə bilərdi. Minnətdarıq.

Elşən Çingiz

Tədbirdən fotolar